Матэрыял падрыхтавала Рудэнка Л. Р.,
Класны кіраўнік 11 “А” класа
 Кожны з нас шчаслівы, калі…
Шчаслівы можа быць любы чалавек. Трэба толькі навучыцца адчуваць яго, гэта шчасце. Устаў зранку – паглядзеў у акно, сонейка свеціць, птушкі спяваюць… І настрой падымаецца. Трэба толькі бачыць і адчуваць шчасце, умець дарыць яго людзям. Яно вакол нас, яно ўнутры нас!
Шчасце нельга купіць, прадаць, выйграць, яго толькі можна ўзрасціць у сабе і дзяліцца з другімі. Прыемнае ласкавае слова, выпадковая ўсмешка, нечаканы званок старога сябра – хіба гэта не шчасце?..
Шчасце ў кожнага сваё… Для мяне самае вялікае шчасце – каб здаровымі былі ўсе мае родныя і блізкія людзі.
Грыцкевіч Дар’я
***
Шчасце - гэта, калі…
У кожнага чалавека сваё разуменне шчасця. Для адных – гэта грошы, матэрыяльныя каштоўнасці, для другіх – сямейны дабрабыт, для дарослых – праца, сям’я, дом, для дзяцей – любоў і клопат дарослых…
Можа быць, багатым і жывецца лягчэй, але ж сапраўднага шчасця, сяброўства. Здароўя не купіш ні за якія грошы. Таму для мяне шчасце – гэта здароўе маіх блізкіх. Ды і ўвогуле, шчаслівы той, хто будуе шчасце не толькі для сябе, але і для іншых, і не баіцца падзяліцца ім з бліжнім.
Навіцкая Ангеліна
***
Калі хочаш быць шчаслівым, будзь ім!
Кожны чалавек імкнецца да шчасця. Мусіць, не памылюся, калі скажу, што ў кожным закладзены гэты пошук. Але не ўсе разумеюць, што шчасце – гэта яшчэ і яскравае сонейка, чыстае неба, цёплая ўсмешка матулі, падтрымка бацькі, каханне… Для кагосьці шчасце – новы сябар сабака, а для іншага – грошы, другому заўсёды ў радасць - маленькія прыемныя дробязі. Для дзяцей шчасце – гэта шакалад, марожанае, паветраны шарык, для дарослых – сям’я, дзеці, добрая працаі ўтульны дом.
Мне цяжка вызначыць, што такое шчасце для мяне. Бо шчасце бязмежна. І ўсё ж паспрабую вызначыцца. Па –першае, я шчаслівая, бо ў мяне ёсць цудоўныя бацькі, усе здаровыя блізкія, па-другое, я маю верных сяброў і аднакласнікаў. Для мяне будзе вялікім шчасцем, калі з гадамі сябры застануцца сябрамі, бацькі і родныя будуць здаровыя, а ў мяне узнікне свая сям’я, Вось гэтыя рэчы для мяне самыя важныя.
Шчасце бывае рознае. Але якое б яно ні было, для кожнага яно самае прыемнае адчуванне. Мне здаецца, што мы часта яго шукаем далёка і доўга, а яно побач. Азірніцеся, адчуйце радасць кожнага імгнення, конага дня.
Калі хочаш быць шчаслівым, будзь ім!
Таболіч Наталля
***
Сакрэт шчасця
Шчасце чалавека – гэта адна з найвялікшых загадак і памылак чалавецтва. Кожны з нас імкнецца стаць шчаслівым, а калі не вельмі атрымліваецца – мы пераконваем сябе і другіх у тым, што ты шчаслівы, ці што шчасця няма ў прыродзе.. Адсюль і блытаніна. Няшчасныя людзі павучаюць нас, як можна стаць шчаслівымі на аснове сваіх назіранняў. Адзін кажа: “Сакрэт шчасця ў гэтым..” Другі пераконвае ў іншым. Усе хочуць знайсці сакрэт шчасця самі…
Але не ўсе знаходзяць. На самай справе ўсе людзі не такія ўжо і розныя. Усім нам трэба чыстае паветра, цёплае сонейка, падтрымка родных людзей і сяброў. Дык давайце ж цаніць кожны дзень, кожны цёплы дотык рукі і душы.
І вялікага сакрэту няма: будзь проста сабой, будзь шчаслівы!
Альховік Кацярына
|
