 Настасся Рудэнка
Ты прыгажэй кутка не знойдзеш
За берагі Случанскіх вод –
Старобін чацвёртае стагоддзе
Гісторыі свой сочыць ход.
І шчасце тут было, і гора,
Але агонь бяды заціх.
Хоць воды Случы не гавораць,
Я чую ў сэрцы голас іх…
Сто рабынь, сто рабін, стары Бін, староба (стары чалавек)…Кожная з гэтых версій назвы майго мястэчка мне здаецца верагоднай і правільнай. З легенд пра Старобін і пачалася мая зацікаўленасць гісторыяй роднага куточка. Я вельмі люблю свой пасёлак, таму ўжо пяты год з’яўляюся членам гуртка “Юны этнограф”, дзе мы знаёмімся з гісторыяй, культурай, бытам малой радзімы – Старобіншчыны. І кожны год з задавальненнем я слухаю легенды пра Старобін, якія з натхненнем распавядае кіраўнік новым членам гуртка.
Нас настолькі захапілі легенды пра Старобін, што мы іх тэатралізавалі ў літаратурна-драматычнай кампазіцыі “З легендаў і казак былых пакаленняў”. Кампазіцыя была прызнана лепшай на раённым фестывалі тэатральнага майстэрства. Ды інакш і быць не магло: такая багатая гісторыя ў нашага мястэчка. Ці не дзіва - хутка 400 гадоў!
Старобінская зямля багата і сваімі людзьмі. Мне падабаецца, як пра гэта сказала В.Аколава, паэтка-зямлячка: “З дзён учарашніх Случанская зямля і яе духоўнасць удзячны Уладзіславу Сыракомлі, казачніку Рэдкаму, Аркадзю Чарнышэвічу, Янку Чарнышэвічу, Янку Скрыгану, Галіне Макаравай…Як буслянак вясной – пералік імёнаў: высокі і даляглядны. Айчына крывічоў, прыпалеская Салігоршчына – на гордасць мужная і былінная”.
Мы ганарымся, што наша старобінская зямля дала свету цудоўную актрысу Галіну Макараву. Яе імя ўшанавана ў назве вуліцы пасёлка, а ў Дзіцячым доме творчасці прымае юных старобінцаў і гасцей музей Галіны Макаравай.
Гераічныя старонкі гісторыі ўваскрашаюць і імя Алега Вабішчэвіча, трынаццацігадовага разведчыка, які быў замучаны нямецкімі карнікамі за сувязь з партызанамі. Наша піянерская дружына з гонарам носіць яго імя.
Можна доўга яшчэ пералічваць славутых людзей Старобіншчыны, і за кожнай вялікай постаццю – цэлая гісторыя, прыклад адвагі, таленту, адданасці Бацькаўшчыне.
Вось за гэта, у першую чаргу, і люблю я свой край - мілую Старобіншчыну. А яшчэ за прыгожыя краявіды, за цудоўных сяброў, за родных і землякоў, якія кожны дзень дзеляць са мной радасці і клопаты жыцця на гэтай гераічнай, старажытнай, славутай Старобінскай зямлі!
| 
