Рудэнка Людміла Раманаўна
 Гісторыя Міжнароднага свята роднай мовы вядзе свой адлік ад 1957 года.
Прапанавала абвясціць гэта свята невялікая азіяцкая краіна Бангладэш: там 21 лютага 1957 года, адстойваючы сваё права вучыцца на роднай мове, загінулі пяць студэнтаў.
У нашым рознагалосым свеце больш за шэсць тысяч моў.Палова з іх пад пагрозай знікнення. Іменна для іх захавання ЮНЕСКА і абвясціла дзень роднай мовы. Але для носьбітаў любой мовы гэта нагода яшчэ раз задумацца аб лёсе роднай мовы, на якой вымавілі першае слова.
21 лютага – нагода задумацца і жыхарам Беларусі аб лёсе роднай мовы. Яна шмат не патрабуе, але павінен быць у чалавека абавязак любіць і зберагаць родную мову, абараняць яе.
У нашай школе з нагоды гэтага свята прайшло шэраг мерапрыемстваў. Па-першае, 19 лютага прайшоў конкурс знаўцаў беларускай мовы і літаратуры “Буслік-2015”, па-другое, ва ўсіх класах прайшлі інфармацыйныя гадзіны “Шануй і беражы роднае слова”, у 5-6 класах была праведзена інтэлектуальная гульня “ Адчуем смак роднай мовы”. У вучняў была магчымасць выказаць свае думкі наконт патрэбы ў вывучэнні роднай мовы.
Выказванні вучняў на тэму “Чаму трэба ведаць родную мову?”:
Лопан Караліна, 6 клас. Кожны чалавек павінен ведаць сваю мову. Мы жывем у Беларусі, наша родная мова – беларуская. Але, на жаль, мы не размаўляем па-беларуску. Я хачу дасканала ведаць сваю мову. Таму прыкладваю для гэтага ўсе намаганні: рыхтуюся на ўрокі мовы сур’ёзна, чытаю мастацкую літаратуру, гляджу беларускія перадачы па тэлебачанні, спрабую ў паўсядзённым жыцці размаўляць па-беларуску.
Муха Антон, 6 клас. Калі знікне мова, тады знікне народ, і не будзе чаго аставіць нашым нашчадкам!
Боцік Аляксандр, 6 клас. Я жыву ў Беларусі. У нашай краіне – двухмоўе. Але, я лічу, што кожны беларус павінен ведаць родную мову. Без мовы не будзе будучыні ў краіны.
Высоцкая Вікторыя, 6 клас. На беларускай мове, на жаль, я размаўляю толькі на ўроках роднай мовы і літаратуры. Мне падабаюцца ўрокі, бо я з кожным днём папаўняю свой слоўнікавы запас. Я вельмі люблю разважаць на беларускай мове.
Насеня Данііл, 6 клас. У вёсцы ў бабулі я раней адчуваў сябе як іншаземец, бо палову слоў не разумеў значэння. Але з кожны днём, з кожным урокам я ўсё больш і больш разумею і люблю родную мову. І лічу, што беларусы павінны ведаць і аберагаць родную мову.
Круковіч Мікіта, 6 клас. Наша мова знаходзіцца пад пагрозай знікнення. Мы павінны зберагчы родную мову для будучых пакаленняў. Наша мова такая меладычная, такая прыгожая, такая напеўная! Як яе не любіць і не шанаваць!?
Таміла Дар’я, 6 клас. Мы жывем у Беларусі, таму і павінны ведаць сваю родную беларускую мову. Мяне ўразіла гісторыя ўзнікнення дня роднай мовы: людзі гінулі за права вучыцца на роднай мове. Таму вывучаць і ведаць родную мову – святы абавязак кожнага беларуса.
Канановіч Аляксандра, 5 клас. Ведаць родную мову трэба, таму што без яе мы будзем кім-небудзь, але не беларусамі. Родная мова – гэта наша спадчына, наша багацце, якое засталося нам ад нашых мудрых продкаў. Таму гэты моўны скарб мы павінны захаваць для будучых пакаленняў.
Нікановіч Анастасія, 5 клас. Мы павінны ведаць родную мову, бо мы нарадзіліся тут, на Беларусі. Тут жывем, тут жылі нашы продкі. Наша мова прыгожая і меладычная, родным слоўка можна суцешыць любога чалавека. Паважаць, вывучаць, аберагаць родную мову давайце ўсе разам!
Даўгучыц Даніла, 5 клас. Дзіўна, чаму ў іншых краінах размаўляюць на роднай мове, а ў нашай вельмі мала людзей размаўляе па-беларуску?... А так хацелася,каб і мы, беларусы, з павагай адносіліся да сваёй мовы.
Данілевіч Яна, 5 клас. Абавязкова трэба ведаць і вывучаць сваю родную мову, бо калі мы не будзем сапраўднымі беларусамі. А яшчэ таму, што мова наша прыгожая і спеўная. Каб добра ведаць сваю мову, трэба грунтоўна вывучаць яе на ўроках мовы і літаратуры, а таксама больш чытаць па-беларуску і размаўляць у паўсядзённым жыцці.
Дрызгаловіч Ксенія, 5 клас. Родная мова – скарб радзімы, а няма роднай мовы – няма радзімы. А няма радзімы – няма і нас.
| 
