Курчык Аляксандр
Для кожнага з нас - самае дарагое, што ёсць у жыцці –сям’я. Менавіта тут закладваюцца духоўныя каштоўнасці чалавека.
Мне вельмі пашанцавала з маёй сям’ёй. Мая сам’я складаецца з шасці чалавек. Дзве бабулі - Алена і Аляксандра, мама Галіна Васільеўна, бацька Сяргей Леанідавіч, брат Раман і я.
Пачну я, напэўна, са старэйшын – маіх дзядуляў. Дзед па мамінай лініі – Васіль - нарадзіўся ў 1928 годзе на Случчыне. У час вайны яму было чатырнаццаць гадоў. Усё свае жыццё ён працаваў на эскаватары, капаў кар’еры , ён – меліяратар з вялікай літары. Таксама ён удзельнічаў у "раскопцы” вадасховішча ў маім родным горадзе – Салігорску.Усе жыццё ён трымаў пчол, старадаўнім промыслам – бортніцтвам - заўседы хацеў зацікавіць і мяне. Дзядуля быў вельмі шчодрым чалавекам.
Па бацькавай лініі - дзед Леанід, як мне расказвала бабуля, быў вельмі вясёлы і добры чалавек, нарадзіўся ён у пачатку другой сусветнай вайны, усё жыццё працаваў брыгадзірам у калгасе. Я яго памятаю як цудоўнага апавядальніка.
Што тычыцца маіх бабуль, то яны - самыя добрыя людзі, якіх я калі-небудзь сустракаў на сваім шляху. Я заўсёды з вялікай ахвотай іх наведваю, дапамагаю па гаспадарцы.
Зараз я раскажу пра сваіх бацькоў. Яны абодва нарадзіліся ў вёсках і вучыліся ў адной школе. Вучыліся яны на добра і ставяць сваю вучобу ў прыклад мне. Маці ў мяне вельмі сур’ёзна ставілася да вучобы і зараз таксама наказвае, што вучоба – гэта адзін з галоўных пастулатаў у жыцці чалавека. Бацька мне аднойчы сказаў: "Веды – сіла, няведы – страх”. Яго ўсе знаюць як справядлівага чалавека, які заўсёды дапаможа. Зараз ён працуе інкасатарам, маці – тавараведам. Яны мяне заўседы вучаць быць добразычлім, справядлівым, цярплівым, дапамагаць бліжняму.
Брат Раман старэйшы за мяне на сем гадоў, ён з добрымі адзнакамі скончыў школу і цяпер вучыцца ў Віцебскай ветэрынарнай акадэміі на пятым курсе. Многія кажуць,што мой брат характарам пайшоў у маці, а знешне больш падобны да бацькі. У мяне з ім заўседы былі і ёсць добразычлівыя адносіны.
Я лічу, што мне вельмі пашанцавала з маёй сям’ёй. Я ганаруся ёй і люблю сваю сям’ю.
